10-28

Нача́т же Петр глаго́лати Ему́: се мы оста́вихом вся и вслед Тебе́ идо́хом.

10-29

Отвеща́в же Иису́с рече́: ами́нь глаго́лю вам, никто́же есть, и́же оста́вил есть дом, или́ бра́тию, или́ сестры́, или́ отца́, или́ ма́терь, или́ жену́, или́ ча́да, или́ се́ла, Мене́ ра́ди и Ева́нгелиа ра́ди,

10-30

А́ще не прии́мет стори́цею ны́не во вре́мя сие́, домо́в, и бра́тий, и сестр, и отца́, и ма́тере, и чад, и сел, по изгна́нии, и в век гряду́щий живо́т ве́чный.

10-31

Мно́зи же бу́дут пе́рвии после́дни, и после́днии пе́рви.

10-32

Бя́ху же на пути́, восходя́ще во Иерусали́м, и бе варя́я их Иису́с, и ужаса́хуся, и во след иду́ще боя́хуся. И пое́м па́ки обана́десять, нача́т им глаго́лати, я́же хотя́ху Ему́ бы́ти:

10-33

Я́ко се восхо́дим во Иерусали́м, и Сын Челове́ческий пре́дан бу́дет архиере́ом и кни́жником, и осу́дят Его́ на смерть, и предадя́т Его́ язы́ком.

10-34

И поруга́ются Ему́, и уя́звят Его́, и оплю́ют Его́, и убию́т Его́, и в тре́тий день воскре́снет.

10-35

И пред Ним приидо́ста Иа́ков и Иоа́нн, сы́на Зеведе́ева, глаго́люща: Учи́телю, хо́щева, да, е́же а́ще про́сива, сотвори́ши на́ма.

10-36

Он же рече́ и́ма: что хо́щета, да сотворю́ ва́ма?

10-37

О́на же ре́ста Ему́: даждь нам, да еди́н одесну́ю Тебе́ и еди́н ошу́юю Тебе́ ся́дева во сла́ве Твое́й.

10-38

Иису́с же рече́ и́ма: не ве́стася, чесо́ про́сита. Мо́жета ли пи́ти ча́шу, ю́же Аз пию́, и креще́нием, и́мже Аз креща́юся, крести́тися?

10-39

О́на же ре́ста Ему́: мо́жева. Иису́с же рече́ и́ма: ча́шу у́бо, ю́же Аз пию́, испие́та, и креще́нием, и́мже Аз креща́юся, крести́тася,

10-40

А е́же се́сти одесну́ю Мене́ и ошу́юю, несть Мне да́ти, но и́мже угото́вано есть.

10-41

И слы́шавше де́сять, нача́ша негодова́ти о Иа́кове и Иоа́нне.

10-42

Иису́с же призва́в их, глаго́ла им: ве́сте, я́ко мня́щиися владе́ти язы́ки, соодолева́ют им, и вели́цыи их облада́ют и́ми.

10-43

Не та́ко же бу́дет в вас, но и́же а́ще хо́щет в вас вя́щший бы́ти, да бу́дет вам слуга́.

10-44

И и́же а́ще хо́щет в вас бы́ти ста́рей, да бу́дет всем раб.

10-45

И́бо Сын Челове́чь не прии́де, да послу́жат Ему́, но да послу́жит и да́ти ду́шу Свою́ избавле́ние за мно́ги.

10-46

И приидо́ша во Иерихо́н. И исходя́щу Ему́ от Иерихо́на, учеником его и наро́ду мно́гу, сын Тиме́ов Варти́мей слепы́й седя́ше при пути́, прося́.

10-47

И слы́шав, я́ко Иису́с Назоряни́н есть, нача́т зва́ти и глаго́лати: Сы́не Дави́дов Иису́се поми́луй мя.