Рече́ же к ним: дади́те им вы я́сти. Они́ же ре́ша: несть у нас вя́щше, то́кмо пять хлеб и ры́бе две, а́ще у́бо не ше́дше мы ку́пим во вся лю́ди сия́ бра́шна.

Бе́ху бо муже́й я́ко пять ты́сящ. Рече́ же ко ученико́м Свои́м: посади́те их на ку́пы по пяти́десят.

И сотвори́ша та́ко, и посади́ша их вся.

Прии́м же пять хлеб и о́бе ры́бе, воззре́в на не́бо, благослови́ их, и сломи́, и дая́ше ученико́м предложи́ти наро́ду.

И ядо́ша, и насы́тишася вси, и взя́ша избы́вшия им укру́хи ко́шя двана́десяте.

И бысть егда́ моля́шеся еди́н, с Ним бе́ху ученицы́, и вопроси́ их, глаго́ля: кого́ Мя глаго́лют наро́ди бы́ти?

Они́ же отвеща́вше ре́ша: Иоа́нна Крести́теля, ини́и же Илию́, друзи́и же, я́ко проро́к не́кий от дре́вних воскре́се.

Рече́ же им: вы же кого́ Мя глаго́лете бы́ти? Отвеща́в же Петр рече́: Христа́ Бо́жия.

Он же запре́щь им, повеле́ никому́же глаго́лати сего́,

Рек, я́ко подоба́ет Сы́ну Челове́ческому мно́го пострада́ти, и искуше́ну {отве́ржену}бы́ти от ста́рец и архиере́й и кни́жник, и убие́ну бы́ти, и в тре́тий день воста́ти.

Глаго́лаше же ко всем: а́ще кто хо́щет по Мне ити́, да отве́ржется себе́, и во́змет крест свой, и после́дует Ми.

И́же бо а́ще хо́щет ду́шу свою́ спасти́, погуби́т ю́, а и́же погуби́т ду́шу свою́ Мене́ ра́ди, сей спасе́т ю́.

Что бо по́льзует челове́к приобре́т міръ весь, себе́ же погуби́в или́ отщети́в?

И́же бо а́ще постыди́тся Мене́ и Мои́х слове́с, сего́ Сын Челове́ческий постыди́тся, егда́ прии́дет во сла́ве Свое́й и О́тчей и святы́х А́нгел.

Глаго́лю же вам вои́стинну: суть не́цыи от зде стоя́щих, и́же не и́мут вкуси́ти сме́рти, до́ндеже ви́дят Ца́рствие Бо́жие.

Бысть же по словесе́х сих я́ко дний осмь, и пое́м Иису́с Петра́, и Иоа́нна, и Иа́кова, взы́де на гору́ помоли́тися.

И бысть, егда́ моля́шеся, виде́ние лица́ Его́ и́но, и одея́ние Его́ бело́ блиста́яся.

И се му́жа два с Ним глаго́люща, я́же бе́ста Моисе́й и Илиа́,

Я́вльшася во сла́ве, глаго́ласта же исхо́д Его́, и́же хотя́ше сконча́ти во Иерусали́ме.

Петр же, и су́щии с ним, бя́ху отягче́ни сном, убу́ждшеся же ви́деша сла́ву Его́, и о́ба му́жа стоя́ща с Ним.